Бізді назарда ұстаңыз

Негізгі бет

Биылғы облыстық іріктеу айналым кезеңдері осы Маңғыстау өңірінен бастау алған еді. «Қазақстан Барысы» қазақ күресін дамыту қорының баспасөз қызметінің хабарлауынша, осында алғашқы болып іріктеу бәсекесінде 18 жастағы Мейрамбек Жаңабай деген болашағынан көп үміт күттіретін балуан топ жарды.

Енді Мейрамбектің өзіне келетін болсақ, оны білікті азамат Қабыл Бисенбай жаттықтырады. Мейрамбектің де турнирге қатысатын басқа балуандар сияқты бүркеншік аты бар. Кілемге шыққанда күрес жанкүйерлері оны «Жас қыран» деп атайды. Мейрамбектің салмағы – 87 кило, бойы – 177 см. Жігіттер үшін бұл, әрине, аз салмақ емес.

Мейрамбек – биыл турнирдің финалына шыққан балуандар арасындағы ең жасы кіші балуан. Ол негізінен дзюдомен айналысады. Қазақ күресі мен самбоға да бейім. Жасы мен салмағының кіші болғанына қарамай, облыстағы іріктеу бәсекелерінде қарсылас шыдатпаған балуан Астанада өтетін финалдық сында алысқа барсам дейді.

– «Қазақстан Барысы» турнирі нағыз халықтық додаға айналды. Бүгінде күресті серік еткен әрбір жігіт осы додада төрге озсам деп армандайды. Былтыр алып ағалардың бәсекесін қызыға тамашалағанмын. Биыл арыстандай айбатты жігіттердің қатарына қосылып, бақ сынау мүмкіндігі маған да тиді. Финалда нағыз тәжірибелі балуандар өнер көрсетеді. Сондықтан финалдық айқастың тартысты өтетініне сенім мол, – деген еді Мейрамбек бізбен әңгімеде.

Маңғыстаудың намысын қорғайтын екінші балуанның есімі – Балтабек Төтенов. Бүркеншік есімі – «Тәзіке». Балтабектің бойы – 185 см, салмағына келсек, 110 кило.

Балтабек Төтеновтің қазақ күресінде жиған тәжірибесі мол. «Облыстық іріктеу сындарының финалдық айқасында қарсыластың айласына байқамай түсіп қалдым» деп ағынан жарылған балуан қазақ күресінен өткен ел чемпионатында талай рет жүлдеге іліккен. Бұл күндері Бейнеу ауданының әкімдігінде қызмет атқаратын Балтабек 30 маусым күні өтетін финалдық бәсекеде өз өңірінің намысын абыроймен қорғауға ниет етіпті.

Тағы да естеріңізге салсақ, Елбасы Нұрсұлтан Назарбаевтың жүлдесі үшін қазақ күресінен болатын «Қазақстан Барысы» турнирінің финалы 30 маусым күні «Сарыарқа» велотрегінде өтеді. Жобаның бас демеушісі – «Самұрық-Қазына» Ұлттық әл-ауқат қоры.

Дастан КЕНЖАЛИН,

«Егемен Қазақстан».